Langar og stuttar tilvísanir

Til eru tvö afbrigði neðanmálsgreinakerfis Chicago-staðals.

1) Stuttar tilvísanir og heimildaskrá

Fylgi verki heimildaskrá þar sem fram koma allar þær heimildir sem vísað er til, þurfa ekki allar upplýsingar um heimildina að koma fram í tilvísunum. Þá er nóg að skrá stutt form tilvísana því lesandi getur aflað sér þeirra upplýsinga sem þarf til að finna heimildina í heimildaskrá.

2) Langar tilvísanir og stuttar tilvísanir

Ef heimildaskrá fylgir ekki verki eða inniheldur ekki allar heimildir sem vísað er til þarf að skrá allar upplýsingar um heimildina í fyrsta sinn sem vísað er til hennar. Í seinni tilvísunum í sama verk er nóg að skrá stutt form tilvísana.


Liðir í tilvísunum

Í löngum tilvísunum koma fram allar þær upplýsingar sem annars væru skráðar í heimildaskrá. Ef um rafræna heimild er að ræða er vefupplýsingum bætt við aftan við upplýsingar um útgáfu.

Í stuttum tilvísunum á að skrá nægar upplýsingar til að minna lesanda á fullan titil verks eða leiða hann á réttan stað í heimildaskrá. Skráð eru eftirnöfn höfunda, yfirtitill verks og blaðsíðutal.

Ef höfundar eru einn til þrír eru skráð eftirnöfn þeirra allra. Ef þeir eru fleiri en þrír er skráð eftirnafn fyrsta höfundar og o.fl.
Yfirtitill verks er oftast styttur ef hann er lengri en fjögur orð.

 Langar tilvísanir:

1. Paul Hanstedt, „Reforming General Education: Three Reasons to Make Writing across the Curriculum Part of the Conversation.“ Liberal Education 98, nr. 4 (2012): 48, sótt 24. janúar 2014, http://nau.edu/uploadedFiles/Administrative/University_College/Liberal_Studies/_Forms/WritingArticle.pdf.

2. Theresa M. Lillis, Student Writing: Access, Regulation, Desire (London: Routledge, 2001), 27–28.

Stutt form sömu tilvísana:

1. Hanstedt, „Reforming General Education,“ 48.

2. Lillis, Student Writing, 27–28.


Endurteknar tilvísanir í sömu heimild

Ef vísað er til sömu heimildar tvisvar sinnum eða oftar í röð, er nóg að skrá „Ibid“ í stuttum tilvísunum. Ibid er stytting á ibidem sem þýðir „á sama stað“.

5. Farmwinkle, Humor of the Midwest, 241.

6. Ibid., 258–59.

7. Ibid.


Top